Masjid Madheghân, Bhuktè Maso'na Islam è Sampang

GARDU BUDAYA, SAMPANG - Bâḍâna masjid è sabbhân dhisa otabâ kottha akadhi jhekjhek jhâghâna Masjid Madheghân sè bâḍâ neng è lao'na Makam Rato Èbhu, Kalora'an Polaghân Kacamadhân Kottha, Sampang, dhâddhi buktè maso'na Islam ḍâ' dhisa otabâ kottha kasebbhut.

Kantos samangkèn, Masjid Madheghân ka'ḍinto pagghun kaonang  ḍâ' naghârâ manca.

Kacatora ghi' jhâman lambâ', masjid ka'ḍinto pajhât dhâddhi ḍâ'-aḍâ'na kennengnganna rèng bâlli kaangghuy nyebbhâr aghâma Islam è Polo Madhurâ.

Kabhâr ghâpanèka èḍhabuwâghi sareng salèrana Nurul Amik, Jhurkoncè Makam Rato Èbhu.

Totor pèyatorannèpon, jhâ' saongghuna sèttong kennengngan è Kalora'an Polaghân lerres dhâddhi tanḍhâ  maso'na Islam neng è Sampang. Lerres neng è sakothak bhumè jhâghâ parjhughâna Masjid Madheghân.

Nurul Amik acarèta, sa'ellana kala perrang taon 1478, pottraèpon Rato Majhâpaèt, Brawijaya V sè kaonang kalabân jhâjhuluk Radhin Ario Lembu Petteng tèbhâ è Sampang, Madhurâ.

---

Maos Jhughân:

Bulân Ḍâteng, Ratosan Maghârsarè Sampang Bhâḍhi Mangkat ka Tana Soccè https://dimadura.id/bulan-%E1%B8%8Dateng-ratosan-magharsare-sampang-bha%E1%B8%8Dhi-mangkat-ka-tana-socce/

Brawijaya V ka'ḍinto toman aghuru dhâddhi morèddhâ Sunan Ampèl bisareng Sunan Giri. Saèngghâ satèbhâna è Sampang, Salèrana jhujhuk pas nerrossaghi pan-saponapan bâbulângannèpon ḍuwâ' ghuruna, èngghi ka'ḍinto pangajhârân aghâma Islam.

"Masjid Madheghân ka'into aropa'aghi tanḍhâ maso' ḍâ'-aḍâ'na Islam è Sampang. Samangkèn ampon bânnya' maghârsarè sè ḍâteng ka masjid ka'into kaangghuy ngaollè barokah, otamaèpon ḍâ' Radhin Ario Lembu Petteng, pottrana Radhin Pramono tor panerrossa, Syekh Khotib Manto," carètana Nurul Amik ka dimadura.id pan-saponapan bâkto sè tapongkor.

Carèta laèn ḍâteng ḍâri tokang talèktèk kabuḍâjân Sampang, Muhammad Mahdi.

Ḍhimèn, ca'èpon Mahdi mokka' carèta, Radhin Ario Lembu Petteng kèngèng pètodhu kaangghuy abhâḍhi masjid lantaran nyebbhâraghiyâ pangajhârân tor ajhârân Islam neng è Tana Bhumè Sampang.

"Lambâ' Ario Lembu Petteng panèka èparèngè pètodhu abhâḍhi masjid, saèngghâna masjid panèka aropa'agi tong-sèttongnga masjid sè palèng towa neng è Sampang," ḍhabuna Mahdi.

---

Maos Jhughân:

Lèbât Progrâm AUTP, Rèng Tanè è Sampang Bisa Ollè Bhântowan Rp6 Juta Sabbhân Mosèm https://dimadura.id/lebat-program-autp-reng-tane-e-sampang-bisa-olle-bhantowan-rp6-juta-sabbhan-mosem/

Taḍâ' orèng onèng, taḍâ' orèng ngoladhi, tao-tao masjid ka'ḍinto temmo jhâghâ dhibi' kalabân gâib ḍâlem bâkto ghun samalem.

Mahdi mèkkèr namong ta' kasambu', mèlaèpon kabâḍâ'ân ka'ḍinto mènorot salèrana ta' malarat manabi bâḍâ kaèdhânna sareng rèng wâlli sè pon pajhât kaonang saktè mandraguna.

"Aḍhâsar carèta ḍâlem manuskrip sè engko' bâca, Masjid Madheghân panèka ca'èpon pajhât abhângon dhibi' ḍâlem bâkto samalem, èngghi pon nyamana bhârâng gâib, tor sè abhângon nèka semma'  ḍâ' Allah, napa bhâi èngghi bisa, dhâddhi kalabân ridâ'na Allah," ca'èpon.

Pèyatoran laèn èpaḍâpa' maghârsarè Dhisa Polaghân, Ahmad Faisal, compo'na teppa' semma' è seddhi'na Masjid Madheghân.

Kantos samangkèn Masjid Madheghân panèka ca'èpon pagghun èjâgâ tor èrabât. Pan-saponapan bârâghât sè bâḍâ è ḍâlemma, otamaèpon cangghâ sè pa'-empa', kantos samangkèn pagghun ta' èyobâ, sokkla aropa dhâdhingghâlânnèpon Radhin Ario Lembu Petteng.

"Cangghâ panèka bânnya' aghânḍhu'  ma'na, bâḍâ kaangghuy matèngghi dhârâjhât, bâḍâ kaangghuy èlmo, bâḍâ cangghâ sè maghâmpang adhâghâng," totop Faisal nyebbhuttaghi kaghuna'an tong-sèttongnga cangghâ Masjid Madheghân.***